LA UNION – Inarestar dagiti otoridad iti tallo nga indibiduwal ditoy siyudad ti San Fernando gaputa maipagarop nga adda pakainaigan da iti illegal a droga.
Iti drug buy-bust operation ket impatungpal iti nagtipon a puwersa dagiti law enforcement agency iti panangidaulo ti City of San Fernando Police Station, idi kalman (Nobyembre 19) agarop alas 12:01 ti tengngat parbangon iti Brgy. San Francisco ditoy siyudad.
Binigbig dagiti otoridad dagiti dua a naarestar a suspek kas Street Level Individuals, idinto a ti maikatlo ket maibilang a High Value Individual, agpapada a residente ti San Fernando City, La Union.
Kinumpiskar dagiti otoridad iti mapatta-patta a 1.2 grams ti shabu, tallo a selyado a transparent plastic sachet, a mapatta-patta nga agbalor ti Php 8,160.00.
Malaksid ti illegal a droga, kinumpiskar pay dagiti otoridad dagiti non-drug evidence, a kas iti small digital weighing scale, black sling bag, white eyeglass case, black coin purse, buy-bust money, ken dadduma pay a drug paraphernalia.
Dagiti suspek ket adda itan a nakabalud iti PNP custodial facility ditoy siyudad ken sumangsango iti kaso a panaglabsing ti RA 9165 wenno Comprehensive Dangerous Drugs Act of 2002.
