Isagsaganan ti pulisya iti kaso kontra ti driver iti van a maipagarup a responsible ti napasamak a karambola iti lugan idiay Maharlika Highway ti Barangay Bani, ili ti Rosario, La Union.
Naammuan ti Bombo Radyo kenni C/Ins. Bernabe Orobillo, kaso a reckless imprudence resulting to multiple homicide, physical injuries and damage to properties iti idatagda kontra iti respondent driver a ni Jerwin Supnet ti Narvacan, Ilocos Sur gapu iti maipagarup a panangdungpar daytoy iti traysikel a manmanehuen ni Bernardo Abaco Jr. ti Sto. Tomas, La Union.
Malaksid kenni Abaco ket natay met laeng gapu iti aksidente dagiti pasaherona a dua nga agkabsat nga ubing ken kritikal met iti kasasaad ti inada.
Nasugatan met dagiti tallo a nakalugan iti maysa a multicab a nairaman iti aksidente.
Agtaltalinaed iti kwerpo ti pulisya ti respondent driver kabayatan a maur-uray ti pagbanagan iti kaso daytoy iti pisklaya.
