LA UNION – Natay ti tallo a tattao bayat nga agtultuloy a maag-agasan ti dua a dadduma pay kalpasan a naaksidente ti naglugananda a kotse iti national highway ti Brgy. Rissing, idiay ili ti Bangar.
Nabigbig dagiti pimmusay a da Mark Paul Pawa, kabsatna a ni Scotch Paul ken Jake Bacheller, pasig a residente ti Daraga, Albay.
Nadundunor met ti kakaduada a pasahero a da Arvin Victoria, taga-Dasmariñas, Cavite, ken Maricar Caballes ti Quezon City.
Segun ken ni PCI Rogelio Miedes, hepe ti Bangar Police Station, napaspas ti panagmaneho ni Mark Paul iti kotse idi kellaat a napukawan iti kontrol ken naidungpar iti concrete fence ken kayo ti gmelina.
Naipit iti uneg ti kotse dagiti agkabsat a Paua ken narigatan pay dagiti otoridad a nangikkat iti bagida a naideklara a dead on the spot bayat a dead on arrival iti ospital ni Bacheller.
Agtultuloy ita nga agpapaimbag iti pagagasan dagiti dua a nadundunor. (PLAD)
