Pimmusay ti tallo nga indibidual kalpasan a nagdigosda iti kabaybayan a sakop ti Barangay Dalumpinas, San Fernando City, La Union idi malem kalman.
Nabigbig dagiti pimmusay a biktima nga isuda Ian Christopher Atolba, Caluza, 21 anyos, baro, residente ti Imelda Village, Brookside, Baguio City; John Rey Sanggio, 21 anyos, baro, taga Bali, La Trinidad, Benguet ken ni Rogelio Bitayag, 19 anyos ti Trading Post, Pico, La Trinidad, Benguet.
Maibasar iti inisyal nga imbestigasyon alas 10:00 idi bigat kalman, dagiti biktima ken gagagayyemda ket simmangpet iti nasao a lugar tapno umatender ti birthday party.
Ala 1:00 ti malem dagiti biktima ket nagdigos iti naadalem a paset ti baybay. Kalpasan iti sumagmamano a kanito, kellaat a nagpukaw dagiti biktima a nangarayatan dagiti concerned citizens ken gagagayyem dagitoy.
Kabayatan ti search and rescue ti biktima a ni Ian ket naisalakan numan awan ti puot na ken dagus nga naiturong iti maysa a pribado nga pagagasan ngem naideklara a dead on arrival babaen iti attending Physician a ni Jaspraise F. Corcha, MD.
Simmaruno a nasarakan ti bagi ti biktima a ni Rey ngem awanen ti anges na.
Agtutlutloy nga sapsapolen iti nagtipon a puwersa ti PDRRMO, Coast Guard, ken CDRRMO ti bagi ni Rogelio a saan pay nga timpaw manipud iti danom.
Kabayatan na, naiyawid metten iti pamilya ti dua a biktima ti bangkay dagitoy tapno sadiay nga malamayan.
