LA UNION – Agtultuloy iti imbestigasyon dagiti otoridad seknan iti pannaka-ambush ken pannakatay iti tallo a kameng ti Intelligence Service of the Armed Forces of the Philippines (ISAFP).
Napasamak ti insidente idiay Barangay Baimbing, Lamitan, Basilan idi Lunes, Disyembre 23.
Maibasar iti initial report manipud Lamitan City Police Station ken iti Basilan Provincial Police Office, dagiti biktima nga agpapada a miyembro ti ISAFP unit a nakabase idiay Zamboanga, ket nakalugan ti van idi inambush dagiti suspek nga armado ti assault rifles.
Segun kadagiti imbestigador ti Lamitan City Police, dagiti tallo nga ISAFP personnel ket adda iti intelligence mission idiay Lamitan City idi napasamak ti ambush a dagus a nakatayan dagitoy.
Agtultuloy iti panangduktal dagiti otoridad ti pakabigbigan dagiti suspek.
