BR LA UNION – Nakasagana ti City Disaster Risk Reduction Management Office ( CDRRMO) para iti Semana Santa, iti manamnama a panagdupudup dagiti turista iti baybay, partikular inton aldaw ti Sabado de Gloria.
Segun kenni Andrew Fil A. Gonzales, LDRRMO III ti CDRRMO nakasagana metten ti opisinada tapno masigurado ti kinatalged ti amin.
Adda iti 315 a personnel ti ma-mobilize, a pakairamanan dagiti partner agencies ken volunteer groups nga maideploy iti nadumaduma a lugar iti siudad.
Segun ti CDRRMO nga agpokus da iti coastal areas gapu iti panagadu dagiti bisita kasta met iti national highway, nakalatag ti plano a nabingay iti north, east, west, ken south portions tapno nalaka ti panangresponde iti aniaman nga emerhensiya.
Iti tunggal paset a naibaga ni Gonzales, adda naka-standby nga ambulansya a tumulong iti operasyon, kadua dagiti partner agencies a kas iti Bureau of Fire Protection (BFP), City Health Office, ken Philippine Red Cross. Adda met deployment plan a mangiturong kadagiti personnel iti naituding a pwesto wenno assigned areas.
Iti arwaten, adda maideploy a rubber boats iti coastal areas ken makipagtrabaho met ti Coast Guard para iti sea board patrol.
Nakasagana met dagiti first aid kits ken highway patrol units tapno mapaspas ti panangipaay iti tulong no adda emerhensiya.
