BR LA UNION – Agtaltalinaed a naka-high alert ti Provincial Disaster Risk Reduction and Management Office (PDRRMO) ditoy La Union gaputi agpangpangta a napigsa a panagtudo ken angin a tugot ti Tropical Storm Maymay ken iti posible pay nga epekto ti habagat.
Segun kenni John Martin, Information Officer ti Provincial Government of La Union (PGLU), naka-prepositioned dagiti kameng ti PDRRMO nangruna ti Provincial Emergency Operations Center ken amin a disaster monitoring teams, tapno masiguro ti alisto a panagresponde iti anyaman nga insidente a mabalin a patauden ti agtultuloy a panagtudo.
Karaman kadagiti nakasagana ket dagiti ambulansiya, rescue truck, ken heavy equipment a mabalin nga usaren iti search and rescue operations, clearing operations, ken dagus a pannakalukat dagiti kalsada nu adda dagiti matuang ken maspak a sanga wenno puon ti kayo, poste, ken dadduma pay a mangserra iti kalsada.
Kinuna na pay nga adda umdas a suplay ti agas, food packs, ken non food items a mabalin nga iwaras kadagiti residente nga agkasapulan ti dagus a tulong no adda panagbakwit ken dadduma pay nga emerhensiya.
Innayon ni Martin a nangisayangkat pay ti PDRRMO iti prepositioning dagiti rescue equipment ken relief supplies iti nadumaduma a paset ti probinsiya tapno naparpartak ti pannakaited ti tulong ken mapapigsa ti rescue and relief operations.
Maibasar iti kauddian a weather bulletin ti PAGASA, iti northern ken central portion ti La Union partikular iti Luna, Caba, Santol, Bauang, City of San Fernando, San Juan, Bagulin, Aringay, Bangar, San Gabriel, Burgos, Naguilian, Bacnotan, Sudipen, ken Balaoan ket nakapasidong iti TCWS No.2 bayat nga iti nabatbati a paset ti La Union ket Signal No.1
Manipud Tropical Depression, pimmigsa ti bagyo Maymay ket maysa itan a Tropical Storm bayat a dandani stationary manipud iti sentro ti lokasyon na, 70 km laud ti Bacnotan, La Union.
Namnamaen nga ag-landfall daytoy ita a malem wenno inton rabii ditoy La Union wenno idiay Ilocos Sur.
