Lalo pay a pimmigsa ti Super Typhoon Champi, nga iti agdama ket agtaltalinaed iti ruar ti Philippine Area of Responsibility (PAR).
Maibasar iti 4:00 AM advisory ti state weather bureau, naudi a nasaripatpatan iti sentro ti mata ti bagyo iti kaadayu a 1,605 km daya ti Central Luzon, kabuyog na ti angin a 195 km/h asideg iti sentro, ken kapegges a dumanon it 240 km/h.
Dup-dupagenna iti laud amianan-a-palaud iti kapartak a 20 km/h.
Agtultuloy a dupagen ti Super Typhoon Champi ti nasao a direksiyon agingga a sumrek iti PAR, bigat wenno malem ita nga aldaw ti Martes, Oktubre 20.
Apaman a sumrek iti PAR, maikkan daytoy ti local name a ROSAL.
Maibasar iti forecast, agtalinaed a napigsa ti Super Typhoon agingga a dumanon iti peak intensity inton bigat, aldaw ti Miyerkoles, bayat nga adda iti Philippine Sea.
Iti nasao a kondisyon, posible a maipangato ti Wind Signal No. 2 wenno Wind Signal No. 3 kadagiti lugar iti northern ken eastern portion ti Nothern Luzon ken sumagmamano a paset ti Bicol Region.
Apaman a dumanon iti peak intensity, dagus met laeng a kumapsot agingga inton Huwebes, Oktubre 22.
Nupay nababa ti tiyansa nga ag-landfall ti Super Typhoon Rosal, mangigubway latta daytoy iti narungsot nga angin iti kaadwan a lugar iti Luzon , Visayas, ken sumagmamano a paset ti Mindanao ken napigsa a panagtudo iti Extreme Northern Luzon.
Ita nga aldaw ti Martes, mangrugin a marikna ti rungsot ti bagyo kadagiti lugar iti daya a paset ti Southern Luzon ken Visayas gapwanan ti trough ti Super Typhoon Champi wenno Rosal.
Namnamaen a rumwar ti bagyo iti PAR inton Sabado, Oktubre 24, 2026.
