BR LA UNION – Ti tropical Depression Pilandok ket agtaltalinaed a nabuntog wenno dandani saan nga aggar-garaw iti rabaw ti Philippine Sea.
Maibasar iti 11:00 PM bulletin ti PAGASA, ti bagyo pilandok ket namnamaen a pumigsa kas tropical storm bayat a dup-dupagenna iti Southern Japan ngem agtaltalinaed nga adayu iti kadagaan ken nababa ti tyansa nga ag-landfall ditoy pagilian.
Naudi a nasaripatpatan ti sentro ti Bagyo Pilandok iti kaadayu a 1,060 km daya ti Extreme Northern Luzon, kabuyog na ti angin a 55 km/h asideg iti sentro ken kapegges a dumanon iti 70 km/h.
Maibasar iti forecast track ti bagyo, dandani stationary wenno saan nga aggar-garaw iti Philippine Sea, daya ti Extreme Northern Luzon iti sumaganad a 24 nga oras.
Namnamaen a rumuar iti Philippine Area of Responsibility (PAR) inton rabii ti Miyerkoles (September 2) wenno bigat ti Huwebes(September 3).
Nupay awan ti direkta a pangta ti bagyo wenno Tropical Cyclone Wind Signal a nakangato ditoy pagilian, agtultuloy met a papigsaen na iti Habagat (Southwest Monsoon) kagiddan ti dadduma pay a sistema iti ruar ti pagilian.
Mangparnuay ti habagat iti panagtudtudo, panaglayos, ken landslide iti dakkel a paset ti Luzon, pakaibilangan idiay Metro Manila, Central Luzon ken Western Visayas.
