Iti tema a “Once a PNP, Always a PNP,” balligi a naisayangkat iti Police Regional Office 1 – Police Retirees’ Association, Incorporated 1 (PRAI-1) Get-Together 2026.

Paset iti aktibidad ket ti panagbotos ti baro nga opisyales ti organisasyon, nu sadinno ket nabotosan kas baro a Presidente iti PRAI-1 ni Retired Police Major Myrna Zarcilla, nga isu’t sumukat kenni Retired Police Brigadier General Pedro Obaldo Jr.
Kinuna ni Zarcilla a ni Obaldo mismo iti kummidaw iti kaadda iti eleksyon agsipud ta kayat nan nga ipamaysa iti pamilya ken trabaho a kas pastor kalpasan iti panagretiro.
Segun kenni Zarcilla, kangrunaan a prayoridad na iti panagtakem iti posisyon ket ti sapasap a pagsyaatan dagiti retirado a miembro iti asosasyon.

Aminado met isuna nga awan pay dagiti naisagana na a programa iti agdama agsipud ta saan na met a ninamnama a mabotosan kas presidente.
Kabayatanna, nagpanawagan ti opisyal kadagiti pada na a retirado a pulis, saan laeng para kadagiti miembro iti PRAI-1, nga agtitinnulong ken isakit ti maysa ken maysa.






