LA UNION – Kaso a panaglabsing iti RA 9165 wenno Comprehensive Dangerous Drugs Act iti naidatag kontra iti maysa a 32-anyos a mister nga immuna a naireklamo, gapu iti panangallilaw na iti maysa a baket, kasaruno iti pannaka-kumpiskar kenkuana ti iligal a droga idiay Barangay Ortiz, Naguilian, La Union.
Nabigbig iti suspek a ni Armando de Guzman, addaan asawa, tubo ti Barangay Balaang, Pozorrubio, Pangasinan, ken madama nga agnanaed idiay Barangay Cupang, Sto.Tomas, La Union.
Segun kenni PCI Reynaldo Soria, officer in charge ti Naguilian PNP, immasideg ti suspek iti biktima a ni Lery Moratillo, 63, addaan asawa, residente ti Brgy. Imelda, Naguilian ken nagpabigbig kas maysa nga OFW.
Kabayatan iti panagsarsarita dagiti dua ket maipagarop a dinawatan ti kuarta ti suspek iti biktima ken kayat nga i-recruit ti suspek iti anak ti biktima.
Ngem nakadlaw iti biktima nga arigna al-allilawen isuna ti suspek isunga dagus a nagpaarayat kadagiti otoridad.
Iti met panagresponde dagiti pulis ket naalaan da iti suspek ti (1) a sachet iti maatap a napagango a bulong ti marijuana.
Iti agdama, agtaltalinaed iti pagbaludan ti suspek para iti naan-anay a disposisyon.
