LA UNION – Sag-saganaan ita dagiti uppat a regional offices ti Department of Tourism (DoT) iti maangay a maika-12 a NorthPhil Expo idiay Clark Pampanga inton Nov.17-19, 2017.
Naamwan ti Bombo Radyo La Union kenni Modesto Ding Baloloy, chief tourism operations officer ti DoT Region One, a ti North Philippines (NorthPhil) Tourism and Travel Expo ket pakaitampokan dagiti agkakangayeg a tourism ken cultural wonders iti amianan a paset ti Pilipinas.
Pakipasetan daytoy dagiti tourism offices iti Region 1, 2, 3, ken Cordillera Administrative Region (CAR) ken dadduma pay nga stakeholders.
Segun kenkuana, tinawen nga adda dagiti baro a partuat a produkto kas koma iti taraon, craft ken textiles, baro a tourist spots and destinations a nasken a maiyam-ammo tapno maka-allokoy iti ad-adu a lokal ken gangannaet a turista.
Iti tema ita a tawen iti nasao nga event ket United Nations World Trade Organization: International Year of Sustainable Tourism for Development 2017.
