BR LA UNION – Nagsagaba ti pannakadun-dunor iti bagi dagiti uppat a tattao a naglugan ti dua a motorsiklo, iti napasamak a traffic accident iti kawatiwatan ti McArthur Highway a sakopen ti Barangay Pagdaraoan, San Fernando City, La Union agarop alas 6:30 ti bigat idi Martes, Mayo 27, 2025.
Dagiti karaman iti aksidente ket pakaibilangan ti motorsiklo a minaneho ti managan Ernesto Regua, agtawen ti 52, mannalon, addaan ti professional driver’s license, residente ti Barangay Pantay Daya, Vigan City, Ilocos Sur addaan ti backride a ni Arminda Regua, 52-anyos; maysa a kotse, minaneho ni Ensign Ronnie Leonen ti Coastguard District NorthWestern Luzon, residente ti Gen. Prim West, Bangar, La Union; ken maysa pay a motorsiklo a minaneho ni Lito Caluza, agtawen ti 38, baro, addaan ti backride a managan Alahdin Caluza, agtawen ti 26, agpada a construction worker ken residente ti Barangay Paringao, Bauang, La Union.
Maibasar iti inisyal nga imbestigasyon dagiti otoridad, iti motorsiklo a man-manehuen ni Caluza nga agturong iti amianan a direksiyon ket maipagarop a kellaat a nagsikko iti bangir a paset ti kalsada.
Gaputi dayta, nadungpar na iti motorsiklo a minaneho ni Regua nga agturong iti abagatan a direksiyon ken nairaman metten a nadungpar iti sumarsaruno a kotse a manmanehuen ni Leonen.
Gaputi kapigsa iti impact ti aksidente, naipurwak iti kalsada da Regua ken natumba met da Caluza, puon ti nagsagabaan dagitoy ti pannakadun-dunor iti bagi.
Dagus a naiturong dagiti biktima iti Ilocos Training and Regional Medical Center (ITRMC) para iti pannakataming dagitoy.
Kabayatanna, iti nagmaneho ti kotse ket saan a nadunor ngem naiturong latta iti city health office para iti pannakataming na.
Segun kadagiti otoridad, ti nasao nga insidente ket maysa a human error wenno reckless driving.
