LA UNION – Agtultuloy pay laeng a dukduktalen ti Bureau of Fire Protection (BFP) ti makagapu iti pannakauram ti maysa a pasdek idiay Barangay San Vicente, San Fernando City, La Union itay tengngat’ aldaw.
Maibasar iti inisial nga impormasion a nakalap ti Bombo Radyo La Union, naklaat laengen dagiti residente idi nadlawda ti panaggil-ayab ti apoy kadagiti nasao a balay a kukua ti managan Romeo Laygo ken pagindegan ti agarup uppat a pamilia.
Iti pannakiuman kadagiti occupants, kinunada nga awan dagiti dadduma nga agindeg kadagiti babbalay idi napasamak ti insidente.
Napaspas met a nagwaras ti apoy gapu ta daanen ken naaramid iti light materials ti pasdek.
Narigatan met dagiti bumbero a mangsebseb iti apoy gapu iti kinapigsa ti angin.
Segun pay kadagiti aggigian iti balay, manmano laeng dagiti naisalbada nga alikamen manipud iti uneg ti babbalay.
