Impila ni Maynila Representative Rolando Valeriano, ti maysa a singasing a linteg a panggep a kissayan ti 50% iti toll fee kadagiti amin nga expressways ditoy pagilian.
Tarigagay ti singasing a makatulong kadagiti motorista, commuters, ken negosyo nga agtultuloy a maap-apektaran ti ngumatngato a presyo dagiti produkto a petrolyo iti sangalubongan a merkado.
Kinuna ni Valeriano a ti nangato a bayad iti toll ken gasolina ket direkta a mangpangato ken mangapektar ti transportation ken logistic costs nga inton agangay ket maipasa’n tu met kadagiti presyo ti magagatang ken serbisyo.
Agtalek isuna a makatulong iti panagkissay ti toll fee tapno mapalag-an ti gastos iti publiko ken kadagiti negosyo nga stakeholders dagitoy nga expressways iti panangipatulod kadagiti produkto da.
Ti agdama ket agbalbaliw ti toll rate dagiti expressways ditoy Pilipinas, depende iti klase ti lugan ken kaadayo ti biahe, ken mabalin a dumanon ti nasurok-kumurang P5 agingga nasurok P800 tunggal biahe para ti Class 1 vehicles a kas ti kotse ken SUV.
Manamnama a dumalan pay iti deliberasyon ti Kongreso ti singasing a gakat sakbay a naan-anay nga agbalin a linteg.
