Pinalubusanen iti Land Transportation Franchising and Regulatory Board (LTFRB) Region 1 iti 50% nga operasyon iti pampubliko a transportasyon iti La Union iti laksid nga adda iti sidong ti Modefied General Community Quarantine (MGCQ) ditoy probinsiya.
Iti pannakiuman iti Bombo Radyo La Union kenni LTFRB Region 1 Atty. Anabelle Nullar, kinuna na a babaen iti naipaulog a Regional Memorandum Circular, 81 a ruta wenno 30% iti operasyon dagiti pampubliko a bus ken jeep.
Gapu ti daytoy, manayonan dagiti maluktan a ruta ken iti units iti pampubliko a behikulo nga agbiyahe.
Gagem daytoy a masungbatan iti pagkasapulan dagiti pasahero ken LGU iti kanayonan a pampubliko a behikulo a pagluganan dagitoy kadagiti naituding nga ruta.
Mainaeg daytoy, mangrugi ti panangisumiter iti aplikasyon para iti special permit dagiti drivers ken operators inton aldaw iti Lunes, September 7 agingga Sept. 11, 2020 manipud alas otso agingga alas singko iti malem.
Mabalin met nga isubmite dagiti requirements babaen iti email address nga ltfrblaunion@yahoo.com
Nainget iti pannakasurot iti minimum public health standards kadagiti pampubliko a behikulo a pannakaikabil iti barriers iti uneg iti behikulo.
Impaganetget pay ni Atty. Nullar a dagiti agaplikar iti special permit ket masapol nga addaan da ti valid franchise, agdama a nakarehistro ken addaan iti valid a personal passenger accident insurance.
Kannayunan na, masapol a makapasa dagitoy a behikulo iti roadworthy inspection iti Land Transportation Office (LTO).
