LA UNION – Agtultuloy nga agpapaagas iti Bungol District Hospital ti innem nga indibidual kalpasan nga bimmaliktad ti nagluganda dagitoy a truck a nagkarga ti 174 kaban ti bigas iti kawatiwatan ti national higway idiay Barangay Ar-arampang, Balaoan, La Union idi malem kalman.
Nabigbig dagiti biktima isuda Willy Nuevas, 47, addan asawa, driver ti truck, Melvin Valdez, 24, baro; agpada a residente ti Sta. Maria, San Jacinto, Pangasinan; Alex Kallapag, 30; addan asawa, residente ti Tugegarao City, Cagayan; Dominador Regelme, 54, balo; Rommel Liberato, 24, addan asawa; agpada a residente ti Sto. Domingo, San Manuel Pangasinan; ken Jestoni Mina, 25, residente ti San Manuel, Pangasinan.
Iti pannakiuman ti Bombo Radyo La Union kenni SSgt. Reynaldo Mago manipud Balaoan Police, kinuna na naggapu idiay Pangasinan ti nasao nga truck ken agturong idiay ili ti Balaoan tapno agideliver.
Maipagarop a liniklikkan ni Nuevas iti nakasinnabat na a lugan nga agturong met iti abagatan ket napukawan daytoy ti kontrol iti manibela nga nagreslulta iti panagbaliktan ti naglugan dagitoy.
Aganay P138,000 ti balorna dagiti nasao a kinaban a bagas.
