LA UNION – Dagus nga imbilin ni C/Supt. Amador Corpus, Regional Director ti Police Regional Office 3 iti panangpatakyas kadagiti innem a pulis a nakadistino idiay Carranglan Municipal Police Station kalpasan a mangisaysayangkat dagitoy iti extortion activities iti maysa a check point idiay probinsya ti Nueva Ecija.
Sigun kenni C/Supt. Corpus, saanda a nagkurang iti palagip ken ballaag kadagiti pulis maipapan iti naiyatnag a pammilin a saan a mairaman iti iligal nga aramid wenno aniaman nga eskandalo.
Kasapulan kinuna nga ipatungpal ti maiparbeng a pannusa kadagiti naglabsing a tauhan iti pagannurutan ti Philippine National Police (PNP).
Kinuna pay ti opisyal, nga itultuloyda iti panangisayangkat ti counter-intelligence kadagiti pulis nga agar-aramid iti saan a maiyanurot a prinsipyo iti organisasyonda.
Immuna iti daytoy, inaresto iti kameng ti PNP Counter-Intelligence Task Force babaen ti entrapment operation dagiti innem a pulis karaman dagiti dua pay a sibliyan idiay Nueva Ecija gapu iti maipagarup a panagkikil dagitoy iti maysa a checkpoint.
Naisayangkat ti nasao nga operasyon kalpasan a makagteng idiay opisina ni Chief PNP Dir. Gen. Ronald dela Rosa iti reklamo kontra kadagiti suspek a mangiparup a mangar-aramid iti extortion activities ti nasao nga ili.
