BR LA UNION – Pito a tattao ti nadun-dunor kalpasan a nauram ti naglugan da a pampasahero nga Air Busan Airbus plane bayat nga agsag-sagana nga ag-take off manipud Gimhae International airport idiay Busan, South Korea idi rabii ti Martes, Enero 28.
Base iti local news agency (Yonhap) idiay SoKor, timpuar ti apoy iti ipos ti eroplano, partikular iti fuselage roof, agarop alas-10:26 ti rabii, local time ken nasebseban iti oras alas-11:31 ti rabii.
Dagus a naiyakar iti amin a 176 a pasahero ken crew members ngem pito kadakuada ti nagpasar ti minor injuries.
Iti nasao a bilang, 169 iti pasahero bayat a 7 iti crew members.
Segun kadagiti Fire authorities idiay Busan, uppat kadagiti biktima a crew members ket nakarikna ti chest discomfort gapu iti nalang-ab da nga asok bayat a 3 a pasahero nga edad 50 agingga 70 anyos ket nakarikna ti panagsakit iti tailbone ken likod.
Gaputi insidente, nakanselar ti scheduled flights iti 8 nga Air Busan flights.
Agtultuloy iti imbestigasyon tapno amwen ti nakaigapwan ti pannakauram ti ipos ti nasao nga eroplano nga agturong koma idiay Hong Kong.
Maipalagip nga idi Disyembre 29, 2024 nag-crash ken bimtak iti Jeju Air plane iti runway ti Muan Airport idi nag-emergency belly landing a nakatayan ti 179 a pasahero ken crew members a pakaibilangan ti piloto idinto a nakalasat iti 2 a flight attendant.
