BR LA UNION – Natay iti pito a tattao agraman ti sumagmamano a menor de edad wenno agtutubo kalpasan ti pammaltog a napasamak iti plaza ti siyudad ti San Felipe idiay Guanajuato, agarop alas 2:00 ti parbangon idi Lunes, oras idiay Mexico, segun kadagiti opisyal.
Iti nakapasamakan ti panagatake dagiti armado a suspek idiay estado ti Guanajuato ket maibilang a most deadly state idiay Mexico agsipudta narway ti kinaranggas nga aramid dagiti agkakalaban a drug gang, banag a nainget a konkondinaren ti Simbaan Katolika.
Nakita dagiti otoridad iti bangkay dagiti biktima iti dua a banner a nakaisuratan ti mensahe para iti Santa Rosa de Lima gang, nga agop-operate iti nasao nga area.
Masansan nga adda maibati a mensahe iti bagi dagiti biktima ti kinaranggas, a mangballaag kadagiti kalaban da a gang nu adda naaramid da a panaglabsing iti pagalladan dagitoy.
