Insungbat dagiti Pilipino iti maysa a survey a lalaki latta ti rumbeng nga agtrabaho bayat a babai met iti nasken nga ag-asikaso ti balay wenno pagtaengan.
Natakuatan iti nabiit pay a Social Weather Stations (SWS) survey nga agtultuloy iti panagngato ti suporta dagiti Pilipino iti tradisyonal nga akem dagiti agassawa manipud pay tawen 2021. Pakabuklan nga 83% iti pabor bayat a 8% met ti kimmontra, wenno 8/10 latta dagiti agtalek a babbai ti nasken nga agnaed ti uneg ti balay, mangasikaso iti pamilya, ken saan a rumbeng nga isu iti agbiruk ti kwarta.
Kaaduan kadagiti respondents ti immanamong a ti panagbalin nga ina ket katupag metten ti mabaybayadan a trabaho (81%) ken adu a babbai iti mangar-arapaap iti balay ken annak (75%).
Napasingkedan pay iti survey a 71% ti nagkuna a dagiti agtatrabaho nga ina ket adda met iti natibker a relasyon da kadagiti annak da, 63% ti mamati a dagiti saan pay nga agad-adal nga annak ti agsagaba nu ti kasta a tawen ket saan dan a makadkadwa ti ina da gapo iti trabaho, kasta met a 51% ti nangibatad a ti pamilya ket agdusa nu ti ina ket addaan iti full-time job.
Naiyuswat ti nasao a survey ti intero a pagilian kadagiti 1,200 a respondents nga agtawen ti 18 agpangato babaen ti face-to-face interviews; 300 a respondents manipud Metro Manila, Balance Luzon, Visayas, ken Mindanao.
