Nakatuding a maidatagan ti kaso iti barito a nakapatay iti kaay-ayam na idiay Sto. Tomas, La Union.
Segun iti Women & Children Protection Desk, agtultuloy pay ti panagkalapda ti impormasyon kadagiti nakakita iti pasamak.
Iti pannakiuman ti Bombo Radyo iti saanen a nagpabigbig a makinkukua ti espada, kinuna na a tugot-tugot daytoy idi nga agturong iti banbantayan a pupokan.
Idi a nakadanon isuna iti lugar maipagarop nga innala iti biktima ti espdada ken inted na pay daytoy iti suspek.
Segun kenkuana, saan na a ninamnama ti pasamak agsipudta ti nasao nga aramas ket ar-aramaten na laeng kas self defense.
Pinatalgedan met ti 16 anyos a kasinsin ti biktima ti pasamak no sadino agin-innangaw dagiti dua ken dadduma a kakadua dagitoy idi makita na iti maipagarop a panangiduyok ti suspek ti espada kagiddan iti pannakikkat ti kalub daytoy a nakaigapuan iti pannakadangran ti immun-una.
Maipalagip, aksidente a matagbat ti tengngedna ti biktima a Al James Estacio, 15 anyos, estuyanten ti Cabaruan Integrated School, ken residente idiay Barangay Cabaruan, ti nasao nga ili.
Kabayatan na, awan pay ti komento ti suspek mainaeg ti nasao a pasamak.(Ann Sheryl Aragon)
