BR LA UNION – Agtultuloy ti imbestigasyon ti San Juan Municipal Police Station iti napasamak a panagtakawan iti San Juan National High School idiay Barangay Ili Sur, San Juan, La Union a pakairam-ramanan iti tallo nga estudyante.
Posible a sumango iti maitutop a kaso dagiti tallo nga estudyante nga agpapada nga adda iti umno nga edad, kalpasan nga aklonen ti maysa kadagiti suspek ti inaramid da a krimen.
Immuna ti daytoy, personal a nagturong idiay San Juan Police Station idi Oktubre 6, 2026 iti 42-anyos a mannursuro, co-teachers, ken ti maysa kadagiti suspek tapno ireport ti pannakapukaw iti ₱81,203 a classroom fund ti Tech Pro Cookery-12.
Naduktalan ti insidente idi Oktubre 4, 2026, idi nadlawan ti co-teacher iti biktima a nabettak ti sarming iti ruar ti silid-pagadalan, naikkat ti uppat a jalousie blade ken puwersa a nalukatan ti maysa a cabinet ti drawer, a nakaidulinan ti nasao a kantidad.
Idi Oktubre 5, maysa nga estudyante nga agtawen ti 19 ti nagpudno iti teacher nga isuna ken dua pay a kakadwa na iti nangala ti nasao a kuwarta.
Binigbig na iti dua a kakadwa na a suspek nga agtawen ti 19 ken 21.
Saan pay nga ammo ti rason nu apay nga inaramid dagiti suspek a takawen ti nasao a classroom fund.
