PANICSICAN, SAN JUAN, LA UNION — Nakemmeg dagiti uppat nga Drug High-Value Targets (HVTs) kasaruno a rauten iti nagkadwa a puersa ti Philippine Drug Enforcement Agency Regional Office 1 (PDEA RO1) ken dadduma pay nga agtuturay iti linteg ti maysa a 3-storey residential house a maus-usar kas drug den sadiay Wavers Beach Club and Residences, Barangay Panicsican, San Juan, La Union, idi kalman, Nobyembre 17, 2026.

Naisayangkat iti operasyon babaen iti bileg ti Search Warrant No. 08-2026 nga impaulog iti Regional Trial Court (RTC), Branch 28, First Judicial Region, City of San Fernando, La Union idi Nobyembre 10, 2026.

Indauloan daitoy iti PDEA RO1 Regional Special Enforcement Team (RSET), kabinnulig iti PDEA Regional Tactical Special Unit 1 (RTSU 1), PDEA La Union Provincial Office, PDEA Ilocos Sur Provincial Office, PDEA RO1 Seaport Interdiction Unit I, PDEA Cordillera Administrative Region (CAR), La Union Provincial Drug Enforcement Unit (PDEU), National Bureau of Investigation (NBI) Region 1, La Union Police Intelligence Unit (PIU), ken San Juan Municipal Police Station (MPS).

Nabigbig dagiti naarestar ti alias nga “Hawaiiano (57)” ken “Eka (45),” aglive-in partners ken agpada a residente iti Barangay Panicsican. Kadwa da pay a naarestar dagiti dua nga stay-in house maintainer wenno trabahador da nga isuda alias “Rick (40)” manipud Murcia, Bacolod, ken “Petrol (30)” manipud Paco, Maynila.

Narekobre iti panagsukimat dagiti otoridad ti 11 heat-sealed plastic sachet a naglaon iti shabu nga addaan iti mapattta-patta a nasurok-kumurang 35.6 gramo a kadagsen ken standard drug price a dumanon ti P242,000.

Malaksid iti droga ken nakumpiskar pay dagiti nagduduma a drug-related paraphernalia, pakairamanan iti digital weighing scale, glass tooters, plastic straws, aluminum foil, lighters, blowtorches, ken opened empty plastic sachet, kasta met iti cellular phone a maus-usar para iti ilegal a transkasyon.

Iti agdama ket adda iti kustodiya ti PDEA RO1 dagiti uppat a suspek a sumangsango iti panaglabsing ti Article II Sections 6, 7, 11, 12, ken 15 iti Republic Act No. 9165 wenno Comprehensive Dangerous Drugs Act of 2002.

Segun kenni PDEA RO1 Regional Director Dir. II Julius M. Paderes, PhD, napateg iti panagtitinnulong dagiti ahensiya ti gobierno ken ti hudikatura tapno naan-anay a maparmek iti operasyon dagiti sindikato.

Impaganetget na nga agtultuloy nga ipamaysa iti PDEA Region 1 iti panagraut kadagiti drug dens ti intero nga Ilocos Region tapno masalakniban ti tunggal pamilya ken komunidad kontra kadagiti dakes nga igubuay iti illegal a droga.