PARIAN, CITY OF SAN FERNANDO, LA UNION – Inlawlawag ni Barangay Kagawad Gina Gurtiza manipud Barangay Parian, Ciudad ti San Fernando iti nag-viral a reklamo mainaig iti pannakatantan iti panagakop iti basura ti masakopan da, partikular idiay Namnama Village.
Segun kenni Gurtiza, awan pay iti bukod a garbage truck iti barangay isu a masansan iti koordinasyon da iti City Government of San Fernando para iti schedule iti koleksyon. Agdama metten iti proseso dagiti dokumento para iti panaggatang ti bukod a garbage truck ti barangay, a manamnama a sumangpet inton tawen 2027.
Impasiguro ni Kagawad Gurtiza a regular ken linawas iti panagakop ti basura iti barangay da ken maipapakaammo iti schedule kadagiti residente babaen kadagiti text messages ken waragawag iti social media.
Kabayatanna, inyunay-unay na a mapalubosan laeng iti panangibelleng tunggal Lunes, Miyerkules, ken Biyernes, manipud alas-kwatro ti parbangon agingga alas-nuebe iti bigat. Maiparit metten iti panangiruar ti basura kadagiti naituding nga aldaw ken oras tapno malapdan iti pannakaurnong na iti kalsada, maliklikan nga iwaris dagiti aso, ken makapataud iti bangsit iti aglawlaw.
Gapo kadaitoy nga isyu, nagpanawagan iti kagawad kadagiti residente nga ammoen pay nga umuna iti sibubukel a pasamak, kasta met a makikoordinar kadagiti opisyales ti barangay, sakbay nga ipablaak iti problema ti social media.
Impaganetget na iti kinapateg ti panagbalin a responsable iti panangibinglay ti impormasyon, nangruna nu ti saritaan ket mabalin a mangibabain iti bukod a komunidad.
Mangnamnama iti barangay a babaen iti bukod a garbage truck ket ad-adda pay a mapasayaat iti sistema iti panagkolektar ti basura iti masakopan da.
