BR LA UNION – Arestado iti 45-anyos a lalaki a nailista kas Top 3 Most Wanted Person iti municipal level idiay Barangay Poblacion, Aringay, La Union, idi Oktubre 13, 2026.
Binigbig dagiti otoridad ti natiliw nga indibidual kas alyas Abat, a residente ti Barangay Santa Lucia, Aringay, ken agtrabtrabaho kas electrician.
Maibasar iti report manipud Aringay Police Station, natiliw ti suspek babaen ti bileg iti warrant of arrest nga impaulog ti Regional Trial Court Branch 32 idiay Agoo, La Union idi Oktubre 1, 2026.
Dua a kaso ti panaglabsing iti Republic Act 9165 wenno Comprehensive Dangerous Drugs Act of 2002 iti sangsangwen ti suspek.
Awan ti nairekomenda a piyansa ti suspek para iti panaglabsing ti Section 5, idinto nga umabot iti ₱200,000 ti naiyetnag a piyansa para iti kaso a panaglabsing ti Section 11.
Kalpasan ti physical examination idiay Aringay Rural Health Unit, naiturong ti suspek idiay Aringay Police Station para iti umno a disposisyon.
