Uppat a ganggannaet a grupo ti maipagarup a nainaig iti illegal drug trade iti Pilipinas, maibasar iti impormasion a rimmuar kalpasan ti briefing ti House Committee on Dangerous Drugs maipapan iti gandat a panagangkat iti shabu nga aggatad iti ₱3.4 billion manipud Laos babaen ti pribado a jet.
Segun iti maysa a nangato nga opisial ti pulisia a nakasarita ni Las Piñas Lone District Rep. Mark Anthony Santos, karaman kadagiti grupo a nainaig iti operasion ket dagiti Chinese ken Chinese-Filipino groups, West African drug-trafficking networks, ken Mexican criminal organizations, pakairamanan ti Sinaloa Cartel, malaksid pay iti Sam Gor transnational drug syndicate.
Karaman pay kadagiti grupo a sigud a nainaig dagiti autoridad iti transnational drug trafficking ket ti United Bamboo Gang, 14K Triad, ken Dragon Wu International Drug Syndicate.
Kabayatanna, impadamag ni PDEA Director General Isagani Nerez nga adda aliansa ti Sam Gor iti lima a triad groups: 14K Triad, Bamboo Union, Big Circle Gang, Sun Yee On, ken Wo Shing Wo.
Mapattapatta a kontrolado ti Sam Gor ti 40 agingga iti 70 a porsiento iti merkado ti methamphetamine iti rehion ken kumitkita iti nasurok a US$17 bilion iti tinawen.
Segun kenni Santos, nasken a maimbestigaran ti posible a relasion dagiti ganggannaet a sindikato ditoy Pilipinas, pakairamanan ti pinansial a suportada ken dagiti pamay-an a maus-usar iti panagipuslit iti illegal a droga.
Agtultuloy met ti panagimbestigar ti komite iti gandat a panagangkat iti shabu manipud Laos tapno maammuan dagiti karaman ken maammuan no kasapulan dagiti baro nga addang iti linteg kontra iti transnational drug trafficking.
