SAN JUAN, LA UNION — Agbalbalin a karit para kadagiti surfing instructors idiay Urbiztondo Beach, San Juan, La Union dagiti dadakkel nga alon a patauden ti Bagyong Rosal, a mangap-apektar kadagiti barbaro paylaeng a maipaspasidong ti surfing lessons.
Segun kenni Analyn Cabansag, maysa a surfing instructor iti lugar, mayat kuma iti panangrugrugi dagiti surfing activities para ita nga umadani a La Union Surfing Break 2026, ngem nagbalin a karit dagiti dadakkel nga alon, uray adayo met iti bagyo ditoy probinsya.
Gapo kadaitoy ket limitado laeng dagiti natalged a lugar a pakaisayangkatan kadagiti surfing lessons, bayat nga ad-adda a delikado para kadagiti mangrugrugi paylaeng nga ag-surf ti agdama a sitwasyon ti baybay.
Nupay kasta ket mangnamnama met ni Cabansag ken dagiti pada na a surfing instructors nga adu latta nga estudyante dagiti agenroll ita a weekend.
Para met kadagiti mayat a makasuro ket intudo na dagiti sabali pay a lugar ditoy La Union a nataltalna dagiti alon; Karaman kadagiti dinakamat na ket ti Carille, Barangay Taboc idiay San Juan, ken sumagmamano a paset ti Bacnotan, depende iti kondisyon ti baybay.
Impalagip met ni Cabansag kadagiti mangayat a padasen iti surfing a taginayunen iti agdengngeg kadagiti lokal ken surfing instructor sakbay nga agturong iti baybay tapno maliklikan ti posible nga aksidente wenno saan a mapakpakadaan a pasamak.
Impaganetget na iti kinapateg nga ipangruna iti kinatalged ken saan a piliten iti ag-surf nu saan a pumabor iti kondisyon ti alon, kasta met a nu kurang ka paylaeng iti kapadasan.
