LA UNION – Adda ita iti punerarya ti 20 bangkay dagiti biktima ti nadara nga aksidente a napasamak iti kawatiwatan ti national highway idiay Barangay San Jose Sur, ili ti Agoo, La Union itattay parbangon.
Iti pannakiuman ti Bombo Radyo kenni Barangay Chairman Marivic Bulacan ti Barangay Pilar, Bauang, La Union, kinunana a siam pay kadagiti biktima a kalugaranna iti madama ita a maag-agasan idiay Ilocos Training and Regional Medical Center (ITRMC) idiay syudad ti San Fernando, La Union.
Immapela met daytoy iti tulong ti gobyerno para iti kasapulan dagiti naulila nga agnanaed idiay barangayda karangrunaan para iti lamay ken punpon.
Iti sabali a bangir, inyestorya iti sumagmamano a kakabagyan ti biktima, a saanda a namnamaen ti napasamak gapu ta naragsak met dagitoy a mangramrambak iti Paskua idi rabii, ken napagtutulagan dagitoy nga agturong idiay simbaan idiay ili ti Manaoag, Pangasinan tapno agyaman iti Dios.
Adda met iti nakaibaga a kabagyan iti naulila a pamila, a maipagarup a naimatanganda a makiin-inom iti arak idiay lugarda ti driver iti jeep a ni Rolando Perez, ngem saanda nga ammo no napaadu ti inumna.
Kabayatanna, ad-adalen met ita ti Agoo Police Station ti posible a maidatag a kaso kontra iti respondent driver ti Partas Bus a ni Rodel Sadac ti Cabugao, Ilocos Sur.
Kinumpirma met ni Sr/Ins. Eugene Balagot, deputy chief of Police ti Agoo Police Station, nakarruaren manipud iti ospital iti amin a pasahero ti bus, ngem agtaltalinaed pay laeng iti ospital ti driver daytoy.
Adda metten iti natalged a kasasaad dagiti siam a nasugatan a pasahero ti jeep ken madama ita nga agpapaimbag idiay ITRMC.
