LA UNION – Dua a person of interest iti nadetermina ken imon-monitor ita ti Luna Police Station a maipagarop a responsable iti napasamak a robbery hold-up, a nakabiktimaan ti maysa nga Indian national idiay Barangay Darigayos, Luna, La Union.
Daytoy ti kinumpirma iti Bombo Radyo La Union ni C/Inspector Roy Villanueva, OIC chief-of-police ti nasao nga ili.
Kinuna na nga on-going iti nainget nga imbestigasyon ti pulisiya tapno takwaten nu iti grupo a nanghold-up iti biktima ket agop-operate iti intero a probinsiya.
Kasaruno daytoy, nagbalakad ni Villanueva kadagiti ‘bombay’ ken dadduma pay nga agpapautang nga agalerto iti amin a gundaway kontra kadagiti dakes nga elemento ken dagus nga i-report iti pulisiya dagiti kapada nga insidente.
Maipalagip nga umabot iti P15,000 iti naala a kantidad dagiti suspek manipud iti biktima a ni Gurmeet Ram, 36, a residente ti Barangay Paringao, ili ti Bauang.
Iti nasao a kantidad ti kwarta ket koleksiyon ni Ram manipud kadagiti pautang daytoy.
Napasamak ti insidente idi napan a lawas kabayatan ti panangiparada na iti motorsiklo daytoy iti igid ti kalsada tapno agturong koma iti balay ni Kapitan Rolando Casipit iti nasao a lugar.
Napartak a naglibas dagiti suspek apaman a naala da iti kwarta nga ikot ti biktima.
