BR LA UNION – Natayen idi masarakan manipud iti ab-abanganna nga apartment iti 65 años a lalaki nga Amerikano idiay Brgy. Washington, Surigao City idi Sabado, Oktubre 10.
Maibasar iti inisyal nga imbestigasyon, nag-check in ti biktima iti nasao nga apartment idiay Mariposa Street, Purok Orchids idi Oktubre 5.
Sakbay a naduktalan a bangkayen ti biktima idi Sabado, maysa a caretaker ti nakigtot iti saan a nasayaat nga angot nga agtataud iti maikadwa a kadsaaran ti nasao nga apartment, partikular iti unit ti biktima.
Babaen iti spare key nga ikot ti caretaker, nalukatan ti unit ket nakita iti bangkay ti biktima.
Im-imbestigaran pay laeng dagiti otoridad iti makagapo ti pannakatay ti Amerikano.
Posible a cardiac arrest iti nakatayanna ngem posible met latta nga adda foul play ti napasamak a krimen.
Saan metten nga insapubliko ti Surigao City Police iti pakabigbigan ti biktima ngem naamwan a residente iti estado ti Florida idiay United States.
Iti agdama, nakikoordinaren dagiti otoridad iti US Embassy ken iti cacabagyan dagiti biktima.
