LA UNION – Malaksid iti kaso a panaglabsing iti R.A. 9165 wenno Comprehensive Dangerous Drugs Act, sumangsango pay iti kaso a panaglabsing iti RA 10918 wenno “The Philippine Pharmacy Act” iti maysa a baro kalpasan a makumpiskaran iti iligal a droga ken peke nga agas, kabayatan ti buy bust operation dagiti otoridad idiay Ili Sur, San Juan, La Union.
Nabigbig ti suspek iti nagan a Samboy Millare, self employed, residente ti Barangay Cabalitucan, Luna, La Union.
Sakbay a natiliw iti suspek ket nakaawat ti tip manipud iti maysa nga informant iti San Juan Police Station, kasaruno iti panangisayangkat da ti operasyon.
Kas resulta, natiliw iti suspek ken nakumpiskaran iti 3 a plastic sachet iti maipagarop a napagango a bulong ti marijuana ken fruting tops, nagduduma nga agas ngem maipagarop a bogus, maysa nga stick ti sigarilyo a maatap a marijuana leaves ken P200 buy bust money.
Iti suspek ket agtaltalinaed iti kustodiya ti San Juan Police para iti umno a disposisyon.
