LA UNION – Saan a nailinged ni sigud a Sudipen Vice-mayor Ley Boquing iti sakit ti nakemna maipapan iti pannakatay ti anakna a ni Mayor Alexander Boquing iti napasamak a panang-ambush idiay ili ti Bangar, La Union.
Iti ekslusibo nga interview ti Bombo Radyo kenni sigud a Vice-mayor Ley, kinunana a posible a naimpluesya ken nabaknang a personalidad nga agtartarigagay a mangidaulo iti ilida ti maipagarup a makinnakem iti panangtambang iti bukodna nga anak.
Saan met nga innaganan ti sigud a bise-alkalde iti ibagbaga daytoy a maipagarup nga oposisyon ngem adda ti
masagsagapna a damag a maipagarup nga agpapaayaben daytoy iti tao ken agiwarwaras iti tig-P500.
Makapaliddaang kinunana gapu iti kinabayagna idi iti benneg ti politika idiay ilida a nakapya tunggal madanon iti eleksyon ket kaanuman saan a nagsayasay ti dara.
Mamati ti sigud a bise-alkalde a saan a kabaelan nga aramiden dagiti kakailyanna a mangpapatay iti anakna, ken mabalin a saan a taga-sadiay dagiti makinnakem.
Sigun pay ti laklakay a Boquing, mangnamnama daytoy a maikkan iti hustisya ti pannakatay ti anakna ken kadagiti dua pay a pimmusay.
Awan met iti panggepna a bumales babaen iti nadamsak a wagas, ngem agpanpanawagan daytoy kadagiti kakailyan nga aramaten iti papel ken pagsurat wenno balota tapno saan nga agballigi dagiti responsable iti panangpapatay iti alkalde.
