LA UNION – Kinumpirma ni S/Supt. Ricardo Layug Jr., Director ti La Union Police Provincial Office nga addan pay ti kaso nga homicide ken dadduma pay a reklamo ti maysa kadagiti suspek iti pannambang kenni Sudipen, La Union Mayor Alexander Boquing ken dagiti kakadua na.
Segun kenni S/Supt. Layug, am-amuenda ita iti pakabigbiggan ti personalidad a maipagarop a tumultulong kadagiti sangsangwen na a kaso ti naaresto nga suspek a ni Rosendo Sibayan ti Balaoan, La Union.
Adda metten ti lead iti Special Investigation Task Group (SITG) tapnno maamuan dagiti kakadua ni Sibayan a maipagarop nga immatake iti pimmusay a mayor.
Kinuna pay ni S/Supt. Layug nga iti agdama ket saan pay a nalawag ti motibo iti insidente.
Immuna ditoy, sinampaan ti kaso a two counts of murder ni Sibayan kalpasan isuna nga itudo dagiti testigo a maipagarop a gunman nga pimmaltog iti mayor ken kakaduana.
Naarestar ti suspek kalpasan nga inserbi ti pulisya iti search warrant ti pagukuman gapu iti panagikot na kadagiti bala ti M-16 rifle iti balay na.
