BR LA UNION – Nangiganwat ti maysa a programa ti lokal a gobyerno ti Bacnotan ditoy probinsiya ti La Union nga addaan ti tarigagay a malapdan iti panagwaras manen ti sakit dagiti taraken a baboy nga African Swine Fever.
Ballaygi iti naisayangkat nga ASF Information Caravan iti sidong ti programa ti Department of Agriculture – Bureau of Animal Industry (DA-BAI) a maaw-awagan ti “May Magagawa Ako”.
Naipatungpal ti nasao a programa iti mismo a Bacnotan Public Market.
Paset daytoy ti National African Swine Fever Prevention and Control Program (NASFPCP) nga addaan tarigagay a palawaen pay ti ammo dagiti stakeholder seknan iti African Swine Fever (ASF) agsipudta maysa daytoy a nakaru a sakit kadagiti taraken a baboy nga agtaltalinaed a pangta iti nasao nga industriya.
Naisayangkat ti nasao nga aktibidad idi kalman, Abril 24, 2025, a nakatutok iti pannakaisuro nu nagtaudan ti sakit, kasatnu nga agwaras, anya dagiti sintomas, ken biosecurity measures kontra ASF.
Tampok pay iti nasao nga aktibidad iti presentasyon ti DA-BAI ken Municipal Agriculture Office, nga indaulwan ni Dr. Divina Gracia Apigo, ken iti partisipasyon dagiti mannalon, biyahero, meat vendors, 47 a Punong Barangay, hog raisers, butchers ken dadduma pay a miyembro ti komunidad.
