Naiwarasen ti Department of Agriculture (DA) iti aganay 500,000 doses ti bakuna kontra African Swine Fever (ASF) manipud 2024 agingga iti kagudua a paset ti tawen 2026, kas paset iti panangpapigsa iti industriya ti baboy ditoy pagilian.
Segun iti Bureau of Animal Industry (BAI), dimmanonen iti 499,008 iti naitudok manipud iti 500,000 doses nga naitukon para iti vaccination program.
Sakup daitoy iti 54 nga hog farms iti pito a probinsya, nu sadinno nangidaulo iti Tarlac iti 287,620 a baboy a nabakunaan, kasaruno iti Batangas nga addaan ti 92,021 ken Bulacan nga addaan met ti 88,107.
Nupay kasta, agtaltalinaed iti aktibo a kaso ti ASF kadagiti 236 barangay iti 23 a probinsya agingga Oktubre 22. Iti sabali a bangir, 716 a ciudad ken munisipalidad iti naibilang a buffer wenno surveillance zones.
Segun kenni Agriculture Secretary Francisco Tiu Laurel Jr., kasapulan a palawaen ken papartaken iti panagbakuna tapnu mapapigsa iti repopulation program ken maisubli iti sigud a lebel iti industriya ti baboy.
Target met iti ahensia a makaala ti panag-apruba para kadagiti bakuna nga ASF manipud South Korea ken United States nu dumteng ti 2027.
