Immaboten iti ₱10.44 ti pannakadadael ken pannakalugi iti sektor ti agrikultura ti pagilian gapu iti El Niño, a nangapektar iti nasurok a 338,000 a mannalon ken mangngalap, segun iti Department of Agriculture (DA).

Maibasar iti datos ti ahensia, 332,726 nga ektaria a talon iti 16 a rehion ti naapektaran, idinto a napukaw ti produksion ti apit iti 311,289 metric tons.

Addaan kadakkelan a pannakadadael ket ti sektor ti mais nga addaan iti napattapatta a ₱5.63 bilion, a sinaruno ti pagay a dimmanon iti ₱3.65 bilion.

Ditoy Ilocos Region, ₱346.12 milion ti nailista a pannakalugi iti agrikultura, a nakaapektar ti 12,595 a mannalon ken 5,694 nga ektaria a talon.

Gapu iti nakaro a tikag, manamnama a bumassit ti produksion ti pagay ken mais ita a 2026. Kas sungbat, nangipaay ti DA iti ₱18.64 bilion a gatad ti tulong ken intervention, agraman dagiti bukel, abono, ayuda, crop insurance, pautang ken alikamen ti irigasion.

Kabayatanna, agtultuloy ti panangmonitor ti gobierno iti epekto ti El Niño, nangruna ti posible a kinakurang ti suplay ti danum ken kanayonan a pannakalugi dagiti mannalon.

Segun iti PAGASA, manamnama nga agtultuloy ti El Niño agingga iti umuna a kagudua ti tawen 2027.