Nagpanawagan manen ti National Press Club of the Philippines wenno NPC ti gobierno a pagsungbaten amin dagiti karaman iti Maguindanao massacre, 17 a tawen kalpasan ti nakam-ames a pannakapapatay ti 58 a tattao, pakairamanan ti 32 a kameng ti media.

Iti statement ti grupo idi kalman Nobiembre 22, kiniddawda iti gobierno nga arestaren dagiti nabatbati a suspek nga agtultuloy a nawaya ken risuten dagiti pending cases a mainaig iti krimen.

Impaganetget ti NPC a napateg nga addang dagiti sentensia a naipaulog idi tawen 2019, ngem saan a naan-anay a nagun-od ti hustisia para kadagiti biktima ken kadagiti pamiliada.

Nagpanawagan pay ti grupo ti pannakapapigsa ti proteksion dagiti journalist tapno masigurado ti kinatalgedda bayat ti panangipatungpalda iti akemda.

Idi 2019, nasentensiaan ti korte ti tallo a kameng ti pamilia Ampatuan iti 57 a bilang ti murder mainaig iti nasao a masaker.