Tallo a tattao ti natay, uppat ti nadundunor ken 36 a trabahador ti mapukpukaw kalpasan mauram iti maysa a paktoria ti kendi sadiay Cikande, Serang Regency, Banten province sadiay Indonesia idi Sabado, Nobiembre 21.
Segun iti Indonesian Search and Rescue Agency (BASARNAS), nangrugi ti uram agarup alas singko ti malem iti paktoria ti PT Fonusa Agung Mulia, a mangpatpataud kadagiti produkto a kendi ken milk-based snacks.
Sangapulo ket lima a trabahador ti nakalasat iti insidente, pakairamanan dagiti uppat a nasugatan a dagus a naiturong iti ospital.
Narigatan dagiti rescuer a serken iti tallo kadsaaran a pasdek gapu iti napuskol nga asuk ken pannakarba ti sumagmamano a paset iti daytoy.
Maibasar iti umuna nga imbestigasion, mabalin a nangrugi ti uram iti asideg ti cooling unit iti maikatlo a kadsaaran.
Agtultuloy met ti search and rescue operations bayat nga imimbestigaran dagiti otoridad ti makagapu iti uram bayat a sapsapulen pay laeng dagiti mapukpukaw a trabahador.










