Ibilbilang ti Catholic Bishops’ Conference of the Philippines (CBCP) a maysa ni Pope Leo XIV kadagiti kabiitan a nabotosan kas Santo Papa iti pakasaritaan ti Iglesia Katolika.
Segun kenni CBCP spokesperson Father Jerome Secillano, dimmanon laeng ti uppat a balota ti nagbalin a binnotos dagiti Cardinals.
Posible a rason iti nabiit a panagbotos ket ti siguden a pannakakonsidera idi kenni Cardinal Prevost ken ti pannakaammo iti naaramidan na iti general congregations nu sadino ket maysa pay isuna a canon lawyer ni Pope Leo ken kabaelan na ti agsao ti nagduduma a lengguahe.
Mabalin nga inkonsidera dagiti cardinal electors nga adda iti nakangatngato a posisyon ti Vatican ni Cardinal Prevost kas Head of Dicastery for Bishops a kadwa ti Santo Papa ti panangidutok kadagiti obispo ti intero a lubong.
Dinakamat pay ni Father Secillano a ti nagan ti Santo Papa ket pangilasinan ti pammadayaw kadagiti mangmangged ken marigritgat.
Imbatad ti CBCP official a nakapamaysa amin a Pilipino a Katoliko ti panagsurot ken panagsuporta iti papacy ti baro a pontiff.
