Inwaragawag ni Russian President Vladimir Putin ti direkta a pannakiuman iti Ukraine idiay Istanbul inton Mayo 15 tapno dakamaten ti peace talk ken ituding ti napaot a kapia, segun iti Kremlin ita a Dominggo.
Mangnamnama ni Putin a makagun-od ti solusyon nga imbes a temporario a pannakaipasardeng ti laban tapno ag-rearm.
Daitoy ket kasaruno ti agingga tallo tawenen a gyera ti nagsinnumbangir a pagilian, manipud pay idi Pebrero 2022 idi limmusob ti Russia idiay Ukraine a nakatayan ti rinibo a soldado da ken kasta met ti agtultuloy a tensyon ti Russia ken kaalyado a pagilian ti Ukraine sadiay Europa.
Pinaregta ni Putin ti Ukraine nga agtuloy ti direkta a negosasyon nga awan ti aniaman a kondisyon ken kinunana a rumbeng a mapagpatangan daitoy inton umay a Huwebes idiay Istanbul, Turkey.
Segun pay kenni Putin, nakikoordinar dan kenni Turkish President Recep Tayyip Erdogan tapno tulongan ti pannakapirmis ti posible a ceasefire.
Nupay kasta, awan pay met ti sungbat manipud Ukraine; adda met dagiti damag mainaig kadagiti European powers ken Estados Unidos a mangipaulog da ti baro manen a sanctions apaman saan nga awaten ni Putin ti kondisyon ti ceasefire.
Maipalagip a tinagiawan-bileg ni Putin dagiti immun-una a ceasefires nga indiaya ti Russia, karaman ti temporario a tigil-putukan idi Mahal na Araw ken ti 72-oras a ceasefire para ti pannakarambak ti selebrasyon ti World War II.
