Posible a dumanon ti manipud P300-M agingga P500-M ti kasapulan a pondo para ti emergency repair ti San Juanico Bridge sadiay Eastern Visayas, kas maibasar ti umuna a patta-patta ti Office of Civil Defense (OCD).
Kinuna ni OCD Administrator Undersecretary Ariel Nepomuceno nga ad-adalenen ti gobierno nu mabalin a mausar ti Disaster Risk Reduction and Management (DRRM) fund agsipud ta awan pay met ti alokasyon manipud ti Department of Public Works and Highways (DPWH).
Napag-ammoan ti kauddian nga assessment ti DPWH nga adda ti problema ti structural integrity ti rangtay isu a maipawil paylaeng a lumabas dagiti lugan nga agdagsen ti nasurok tallo a tonelada.
Maballaagan met dagiti motorista a dumalyasat laeng ti centerline ti tangtay; maysa-maysa laeng ti panagdalan, ken suroten ti traffic advisory iti lugar.
Kas alternatibo ket mabalin nga usaren dagiti nadadagsen a lugan ti RORO ports kas sadiay Tacloban, Calbayog, Ormoc, Maasin, Naval, ken dadduma pay.
Kabayatanna, adda ita ti blue alert status iti OCD – Eastern Visayas ken Regional Disaster Risk Reduction and Management Council (RDRRMC) kas panagsagana ti posible a panagkaro ti sitwasyon. Inrekomendar payen ti Samar PDRRMC iti State of Emergency ti nasao a probinsya.
Manipud Mayo 18 ket maparitanen dagiti pedestrian nga agballasiw usar ti rangtay. Nu ketdi ket agakay a kadagiti coasters wenno nalalag-an a lugan kas paset ti allagaden mainaig ti kinatalged da.
Makuna nga iti San Juanico Bridge a nangrugi a naipasdek idi 1969 ken nagleppas idi 1973 ket ti maikatlo itan a kaatiddogan a rangtay ti intero a pagilian a mangkonkonektar ti Samar ken Leyte.
