BR LA UNION – Dua iti kumpirmado a natay, walo ti nadun-dunor, ken nauram iti aganay 10 nga istruktura a pakairamanan iti babbalay ken lugan kalpasan a nagsuwek ti maysa a Cessna C550 iti military housing idiay San Diego, California.
Nagresulta daytoy iti nalawa a pannakauram dagiti babbalay, dadduma pay a pasdek, ken lug-lugan.
Segun kenni Assistant Fire Department Chief Dan Eddy, naibundaris ti jet fuel iti lugar isunga nangparnuay daytoy ti nalawa nga uram.
Maibasar iti report, direkta a timmama ti eroplano iti babbalay idiay Murphy Canyon.
Iti inisyal nga imbestigasyon dagiti otoridad, ti nasao a private jet ket masansan nga aglaun ti innem agingga walo a tattao, napartuat idi 1985, maibasar iti datus ti Federal Aviation Administration.
Iti agdama, agtinnulong iti National Transportation Safety Board (NTSB) ken Federal Aviation Administration (FAA) iti imbestigasyon ti insidente.
