BR LA UNION – Ad-adalen ti Commission on Elections (COMELEC) iti posibilidad a panangisayangkat ti voter registration iti rabii tapno maallokoy ti ad-adu pay a Pilipino nga agparehistro para iti Barangay ken Sangguniang Kabataan Elections (BSKE) inton Disyembre 1.
Segun kenni COMELEC Chairman George Erwin Garcia ti nasao nga addang ket paset ti panangpalawa ti Register Anywhere Program (RAP) a nakatuding a maisayangkat, manipud Hulyo 1 agingga 11.
Target ti poll body nga isayangkat ti enhanced Register Anywhere Program kadagiti lugar a nakalukat iti rabii, kas koma iti airport, seaport wenno pantalan, ken dadduma pay a lugar ti trabaho.
Mainaig ti daytoy, mangnamnama ti komisyon a babaen iti kanayunan nga oras para iti panagrehistro, magun-od da ti target a maaddaan ti maysa a milyon a baro a rehistrado a botante.
Kabayatanna, malaksid kadagiti baro a registrant, umawat pay ti COMELEC ti aplikasyon para iti reactivation ken transfer ti rehistro ken dadduma pay a kapada a serbisyo manipud Hulyo 1 agingga 11.
