Pinasingkedan ni Senator Robinhood Padilla a pimmerma da Senador Bong Go ken Senador Ronald “Bato” Dela Rosa iti resolusyon na a panggep iti madagdagos a pannakaipasubli ditoy Pilipinas ni sigud a presidente Rodrigo Duterte manipud The Hague, Netherlands.
Nnupay kasta, saan pay met a nangited iti kopya ti resolution ti opisina ti Senador agsipud ta saan pay met nga opisyal a naipila daitoy idiay Senado.
Pinagyamanan ni Senador Padilla dagiti kakadwa na a mamanday-linteg iti panagperma da ken innayon a silulukat isuna kadagiti mangayat pay nga agperma iti nasao a resolusyon kadagiti sumaganad nga aldaw.
Imbatad ni Padilla a nasursurok pay daitoy ngem iti maysa a resolusyon agsipud da daitoy ket panawagan para iti pudno a pagkaykaysa, panagraem ti soberanya, ken hustisya para ti sigud a presidente a situtured a nagserbi ditoy Pilipinas.
Maibilang da Sen. Padilla, Go, ken Dela Rosa iti maawagan kas Duterte bloc wenno kaalyado ti sigud a presidente Rodrigo Duterte ken miembro pay iti nasao a grupo da Senador Rodante Marcoleta ken presidential sister Senator Imee Marcos.
