Kinumpirmar ti Department of Justice nga addaan dan ti ‘ground zero’ a pakairugyan iti maisayangkat a ‘technical diving operation’ iti paset ti Taal Lake ken posible a mairugi daitoyen aniaman nga aldaw ita a lawas.
Segun kenni Justice Secretary Jesus Crispin Remulla, ammon ti ahensia iti lokasion nga imbinglay ken imbutaktak mismo ti iggem da a testigo.
Maibasar iti imbutaktak ti witness, daitoy ket maisa a ‘fishpond’ a maipagarop a kukua ti maisa kadagiti suspek a karaman kadagiti maimimbestigaran.
Innayon pay ni Secretary Remulla nga agtalek iti departamento iti impormasion nga iggem da isu ta sigurado da iti lokasyon a pakairugyan ti nasao a ‘technical diving operation’.
Dinakamat pay ti sekretaryo dagiti karit a sangwen ti technical diving team kas iti kondisyon ti lake bed ti Taal gapo kadagiti mailislista a volcanic eruptions kasta met iti kasasaad iti paniempo.
