Inlawlawag ti Department of Justice Assistant Secretary ken Spokesperson Atty. Mico Clavano a posible latta a maituloy ti ‘conviction’ kadagiti suspek mainaig ti kaso dagiti “missing sabungeros” nga uray awan iti masarakan a bangkay dagiti biktima agsipud ta daitoy ket maiyannurot iti linteg.
Daitoy ket laksid ti maisaysayangkat nga ‘initial diving operation’ ti Department of Justice kabinnulig ti Philippine National Police – Crime Investigation and Detection Group wenno PNP-CIDG ken Philippine Coast Guard.
Kinuna na pay a ti maysa nga indibidwal a nagbasol ket masentensyaan latta babaen iti sabali a wagas a mangpaneknek ken mangidiin kenkuana iti krimen.
Mabalin a mausar dagiti ladawan ken videos kas pammaneknek ken mangpatibker a pudno iti napasamak a wagas ti pannakatay dagiti biktima kas maiyannurot iti “Principle of corpus delicti” a mangdakdakamat iti substance ti krimen a murder; ken nu met adda nga agpayso dagiti masarakan a bangkay, agserbi laengen dagitoy kas kanayunan nga ebidensya.
Maipalagip nga idi laeng kallabes ket imbutaktak ti testigo a ni Julie ‘Dondon’ Patidongan wenn alias ‘Totoy’ a naibelleng dagiti “missing sabungeros” sadiay Taal Lake.
Kasaruno na ket intuding metten ni Justice Secretary Jesus Crispin Remulla iti ground zero para ti diving operation iti maysa a fishpond lease a kuka ti maysa nga akusado.
Innayon pay ni alias ‘Totoy’ a saan na a masinunuo nu kasatno a natay ken ayanti ti lokasyon dagiti dadduma agsipud da naibelleng da met laeng idiay Taal Lake nga uray pay sisibiag paylaeng dagitoy.
