Plano ti National Food Authority (NFA) a mai-auction inton bulan ti Agosto dagiti rice stock tapno makissayan dagiti linaon ti bodega da.
Immunan nga inwaragawag ti NFA iti temporario a panangpasardeng ti panaggatang kadagiti apit agsipud ta napunno aminen a warehouses da.
Kabayatan daitoy ti reklamo dagiti lokal a mannalon manipud Bulacan ken Tarlac a nagkuna a barbaraten lattan dagiti rice traders ti gatad a P8 dagiti apit da.
Segun kenni NFA Administrator Larry Lacson, inaprobaran ti NFA Council ti guidelines para ti maaramid a public sale.
Binilin payen ni Lacson dagiti tao da a mangisayangkat ti assessment iti kalidad dagiti bigas a nasurok lima a bulanen a nakaimbak kadagiti bodega iti tunggal rehion ti Pilipinas.
Agdudua met ti NFA chief ti kaadda dagiti “takers” wenno makipaset iti public sale nu maidiaya ti kababaan a gatad dagiti daan a rice stocks. Iti agdama ket aganay 437K metric tons wenno katupag ti 8.7M a 50-kilo bags ti rice stocks para ti katengngaan ti Hunyo.
Umdas daitoy tapno mapakan ti umili a Pilipino ti agingga dua a lawas.
