Nakasaganan ti Department of Education (DepEd) a makibinnulig ti Office of the Ombudsman para ti napartak ken patas a panagtaming iti kaso mainaig iti maanomalya a panaggatang ti P2.4B a gatad dagiti outdated laptops iti kangitingitan ti COVID-19 pandemic.
Daitoy ket kalpasan nga imbilin ti Ombudsman ti panangipila ti graft ken falsification charges kontra kenda sigud nga Education Secretary Leonor Briones ken dadduma pay nga opisyales ti gobierno.
Pinasingkedan ti ahensiya a naipakaammo kadakuadan ti resolution ti Ombudsman tapno mangipila kadagiti nasao nga charges.
Imbatad pay ti ahensiya a dagiti opisyal nga subject kadagiti kaso ket awananen iti posisyon wenno koneksyon kadakuada.
Nakasagana da pay kunana nga ited amin a kasapulan a dokumento, impormasyon, ken dadduma pay a tulong tapno masiguro a mapagbsungbat dagiti responsable ken maprotektaran ti interes ti publiko.
Nagtaud ti kaso kalpasan iti panangbabalaw ti Commission on Audit (COA) idi tawen 2022 seknan ti panaggatang dagiti outdated ken overpriced laptops nga aggatad ti P53K ti tunggal maysa para kadagiti mannursuro iti pampubliko a lugar.
Daitoy ket iti kangitingitan ti panag-shift idi iti distance learning kalpasan a maipariten ti face-to-face classes gapo iti pandemya.
