Nasentensyaan ti tungpal-biag a pannakaibalud ken awanan ti parole iti 33-anyos a ni Justin D. Mohn kalpasan a mapaneknekan a guilty isuna ti pammapatay ti ama na idi Enero 2024.
Segun kenni Bucks County Judge Stephen Corr, nagbasol ni Mohn iti panangpaltog ken panangpugot na iti ama na iti uneg mismo ti pagtaengan da.
Malaksid iti nakaam-ames nga insidente ket naaramid pay nga ipost ti suspek iti video ti panangpugot na ti ama na iti social media a nagpaot pay ti sumagmamano nga oras sakbay a naikkat.
Segun iti imbestigador, ti napaltogan ket ni Michael F. Mohn, 68-anyos, ken barbaro a gatang laeng iti pinangpaltog kenkuana kasta met a ti naaramat a panangpugot ket maysa a kutsilyo ken buneng.
Kinuna ti County District Attorney a saan a makitkitaan ti panagbabawi ni Justin Mohn ken inladawan ti krimen kas ”unimaginable, unfathomable crime.”
Pinadas na pay a depensaan ti naaramid na a krimen ken kinuna nga inarestar na laeng ti ama na gapo iti panagtraydor ngem inaklon na a pinugotan na daitoy tapno ipatulod ti nainget a mensahe kadagiti empleyado ti gobyerno.
Naarestar ti suspek kalpasan ti panag-uli na iti alad ti Fort Indiantown Gap, maysa a kampo ti National Guard, lugar nu sadino ket nagpanawagan isuna iti publiko a tumulong para iti panagbagsak iti gobierno da.
Narekobre kenkuana ti USB drive a naglaon kadagiti ladawan ti federal buildings ken instructions iti panangaramid ti bomba.
Sumangsango ita isuna ti kaso a possession of an instrument of crime, gun charges, criminal use of a communication facility, terroristic threats, defiant trespassing, ken abuse of a corpse.
